தேடிக் கொண்டிருக்கிறோம்:

                     

அவள் வீட்டோரத் தெருக்களில்

தேடிக் கொண்டிருக்கிறேன்..

நான் தொலைத்த

என் வாழ்க்கையை…

அவளும் தேடிக் கொண்டிருக்கிறாள்….

மொட்டைமாடியில் நின்று கொண்டு

மேகத்துக்கு அடியில்

தொலைந்து போன நிலவை...

அவளது

குழந்தையுடன்…..

விபத்தால் பிழைத்தது

எங்குமே நிற்காமல்

எதையுமே நேசிக்காமல்

இழந்ததை மீட்பதாய் எண்ணி

இருப்பதையும் இழந்து கொண்டு

எங்கே ஓடுகிறோம்…?

எதற்காய் ஓடுகிறோம்..?

என்றறியாமல் ஓடிக் கொண்டிருக்கும்

இயந்திரகதி வாழ்க்கையின்

இரண்டு நிமிடங்களை இழுத்து நிறுத்தியது

அந்த நெடுஞ்சாலை விபத்து….

கூட்டத்தினரின் பிரார்தனைகளையும்

உச்சுக் கொட்டல்களையும்

உதாசீனப்படுத்தி உருகி ஓடியது

அடிபட்டு கிடப்பவனின் உயிர்….

அந்த நிமிடங்களில்

அவன் இறந்திருந்தான்…..

அவசர சிகிச்சையில் இருந்த

மனிதநேயம் பிழைத்துக் கொண்டது……